पुणे जिल्ह्यातील ५० टक्के गावे लंपी रोगाचा संसर्गामुळे ‘रेड झोन मध्ये

पुणे :-जिल्ह्यासह राज्यात जनावरांमध्ये लंपी रोगाचा प्रादुर्भाव वाढत असून, पुणे जिल्ह्यातील ५० टक्के गावे या संसर्गामुळे ‘रेड झोन’मध्ये आली आहेत. जिल्ह्यात आठ लाख पशुधन आहे. त्यापैकी ६०३ जनावरांना लंपीची बाधा झाली असून, २४ जनावरांचा मृत्यू झाला आहे. जिल्ह्यातील पशुधनाच्या तुलनेत पशुवैद्यकीय कर्मचाऱ्यांची संख्या अपुरी आहे. त्यामुळे विभागीय आयुक्तांनी विशेष बाब म्हणून ३२ नवीन पशुधन पर्यवेक्षकांना कंत्राटी पद्धतीने कामावर घेण्याची परवानगी दिली आहे. कर्मचाऱ्यांची संख्या कमी असल्याने खासगी पशुवैद्यकीय अधिकारी; तसेच अन्य कर्मचाऱ्यांना लसीकरण कार्यक्रमात सहभागी करण्याचे आदेश दिले आहेत, अशी माहिती जिल्हा परिषदेचे मुख्य कार्यकारी अधिकारी आयुष प्रसाद यांनी दिली.
जिल्हा परिषदेने खासगी पशुसंवर्धन पदविकाधारकांना जनावरांच्या लसीकरणासाठी मदत करण्याचे आवाहनही केले आहे. जिल्ह्यात चार लाख लशी प्राप्त असून, त्यापैकी सुमारे सव्वादोन लाख जनावरांचे लसीकरण झाले आहे. सरकारी दवाखान्यांतून मोफत लसीकरण करण्यात येणार आहे. त्यासाठी पर्यवेक्षकांना प्रत्येक लस टोचणीमागे तीन रुपयांचे मानधन दिले जाणार आहे. पुणे जिल्ह्यात ९५० खासगी पशुधन पर्यवेक्षक असून, ४५० खासगी पशुवैद्यक डॉक्टर आहेत. लंपी आजाराचा संसर्ग झाला किंवा नाही याचे निदान २१ दिवसांपर्यंत होत नाही. त्यामुळे लसीकरणानंतर त्यांना संसर्ग झाल्यास सौम्य स्वरूपाची लक्षणे असू शकतात. जिल्ह्यात गोठ्यांची संख्या अपुरी असून, पावसात भिजल्याने आणि न्यूमोनियाच्या लक्षणांमुळे जनावरांचा मृत्यू झाल्याचेही प्रसाद यांनी स्पष्ट केले.

Leave a Reply